Rritja e çmimit të energjisë elektrike për 15% është një vendim i padrejtë dhe i papërgjegjshëm që rëndon mbi shpinën e konsumatorëve në një kohë kur kriza ekonomike dhe inflacioni veçse e kanë goditur fuqishëm standardin e jetesës.
Qeveria po hesht, ndërsa qytetarët po varfërohen. Në vend që të ndërhyjë për të mbrojtur interesin publik, ajo po lejon që kostoja e menaxhimit të keq në sektorin energjetik të bie mbi familjet e zakonshme dhe bizneset e vogla.
Bizneset janë të alarmuara. Rritja e çmimit të rrymës në kohë të inflacionit të lartë e rrit më tej koston e prodhimit dhe shërbimeve, duke i bërë ato më pak konkurruese dhe duke rrezikuar mbylljen e shumë prej tyre. Kjo nënkupton humbje të vendeve të punës dhe rritje të pasigurisë ekonomike.
Në një kohë kur çmimet e produkteve bazë në shportën e konsumatorit janë në kulm, vendimi për të rritur edhe një kosto kaq esenciale si energjia elektrike është i papranueshëm. Kjo politikë e mbyllur dhe arrogante e godet drejtëpërdrejt mirëqenien e qytetarëve.
Kërkojmë transparencë, përgjegjësi dhe masa mbrojtëse urgjente për qytetarët dhe sektorin privat – përndryshe, pasojat ekonomike dhe sociale do jenë shumë më të rënda sesa një rritje prej 15%.
