Qytetarët të cilëve u mungojnë deri në 24 muaj stazh për të arritur minimumin ligjor prej 15 vitesh, së shpejti mund të kenë mundësi ta plotësojnë këtë kusht duke paguar vetë kontributet.
Ministri i Politikës Sociale, Demografisë dhe Rinisë, Gjoko Vellkovski, bëri të ditur se propozimi për këtë masë tashmë është duke u shqyrtuar në Qeveri.
Sipas tij, mundësia do të jetë e vlefshme për personat që nuk janë më të siguruar, kanë arritur moshën e pensionimit – 62 vjeç për gratë dhe 64 vjeç për burrat – dhe kanë të paktën 13 vite stazh të realizuar.
Vellkovski sqaroi se këta persona do të mund të paguajnë kontributet për muajt që u mungojnë, deri në maksimum 24 muaj, në mënyrë që të plotësojnë kushtin për pension.
Formula e saktë për përcaktimin e shumës që duhet të paguhet ende pritet të përcaktohet. Megjithatë, ministri tha se baza për llogaritjen e kontributit nuk do të jetë paga e plotë mesatare, por 50 për qind e saj.
Duke marrë si bazë pagën mesatare prej rreth 45.500 denarësh për vitin 2025, kontributi prej 19,9 për qind do të llogaritej mbi një bazë prej rreth 22.750 denarësh. Sipas përllogaritjeve, pagesa mujore do të ishte afërsisht 4.500 denarë.
Kjo do të thotë se për 12 muaj do të nevojiteshin rreth 54.000 denarë, ndërsa për 24 muaj rreth 108.000 denarë, ose afërsisht 1.750 euro.
Pas plotësimit të stazhit të nevojshëm, qytetarët do të mund të përfitojnë pensionin e llogaritur sipas parametrave dhe rregullave të përcaktuara me ligj.
