Kryeministri i Maqedonisë së Veriut, Hristijan Mickoski, në një fjalim me rastin e njëvjetorit të qeverisë së tij, nën sloganin “Po vjen koha e Maqedonisë – Po i ndërtojmë themelet e ndryshimeve”, paraqiti një sërë masash dhe suksese në sektorët kyç të shëndetësisë, arsimit dhe mjedisit jetësor.
Mickoski theksoi se janë larguar drejtorët ekonomikë joefektivë në institucionet publike shëndetësore dhe është hapur procedura për punësimin e 600 specialistëve të rinj.
U rrit bonusi kapitativ për mjekët amë, gjinekologët dhe stomatologët, ndërsa punonjësit shëndetësorë dhe bashkëpunëtorët e tyre në sistemin publik morën rritje pagash.
Për më tepër, qeveria ka zgjeruar listën e barnave të rimbursueshme, ka rinovuar objekte shëndetësore dhe ka furnizuar pajisje moderne për kujdes më të mirë për qytetarët.
Me një plan strategjik për ajër më të pastër 2025–2030, janë miratuar 229 milionë denarë për projekte mjedisore dhe janë ndarë 10 milionë euro për zëvendësimin e sistemeve të ngrohjes me alternativa ekologjike në Shkup, Bitola, Kumanovë dhe Tetovë.
Gjithashtu, janë ndarë 50 milionë euro për përmirësimin e infrastrukturës së ujit dhe 55 milionë euro për ndërtimin dhe modernizimin e sistemeve rajonale për menaxhimin e mbeturinave të ngurta në pesë rajone.
Përmes Ministrisë së Vetëqeverisjes Lokale, janë miratuar 288 projekte në fusha si transporti, arsimi, kultura, sporti dhe mjedisi.
887 projekte të tjera janë në fazë të vlerësimit, ndërsa 129 janë realizuar tashmë për zhvillim të barabartë rajonal.
Mickoski theksoi se arsimi është “arma më e fortë për zhvillim dhe të ardhme”. Për herë të parë pas shtatë vjetësh, nxënësit morën tekstet shkollore që në ditën e parë të vitit shkollor 2024/2025 – mbi 1 milion kopje të shpërndara në kohë.
U ndërtuan 7 shkolla të reja dhe u rinovuan 20 të tjera, si dhe 4 salla sportive për shkollat. Janë zhbllokuar edhe ndërtimet e godinave të reja për fakultetet FINKI dhe Fakultetin e Kulturës Fizike, me investim prej 2 miliardë denarësh.
– Për vitin 2025 janë siguruar 38 miliardë denarë për arsimin – buxheti më i madh ndonjëherë.
– 680 milionë denarë për shkencën – dyfish më shumë se në vitin 2024.
– 274 milionë denarë për projekte kërkimore-shkencore dhe inovative.
– Sigurim i qasjes falas në bazat shkencore SCOPUS dhe Web of Science për të gjithë studentët dhe profesorët e universiteteve publike.
Masa sociale përfshijnë edhe zgjerimin e subvencionimit të ushqimit studentor për studentët me të ardhura të ulëta dhe për ata në studime të avancuara.
– Mësuesit dhe personeli profesional në arsimin fillor dhe të mesëm morën rritje mbi 12%.
– Profesorët universitarë – rritje prej 14%.
– Është nënshkruar marrëveshje për rritje të përgjithshme të pagave deri në 60% në katër vitet e ardhshme.
Në përmbyllje, Mickoski deklaroi:
“Po i ndërtojmë themelet e një Maqedonie të re – moderne, efikase dhe të drejtë për të gjithë qytetarët.”
