Kryetari i Dhomës së Tregtisë dhe Industrisë Kosovë, Skënder Krasniqi, ka marrë pjesë në forumin e bizneseve të Turqisë dhe atyre të Kosovës nga sektori i çelikut dhe metaleve.
Krasniqi ka thënë se Dhoma e Tregtisë dhe Industrisë, është angazhuar vazhdimisht për të gjetur forma të mbështetjes së bizneseve tona dhe një nga to janë edhe takimet B2B, përmes të cilave hapet mundësia për rritje të partneritetit ekonomik dhe shkëmbimeve mes dy vendeve.
Përkundër që eksporti vitin e kaluar kishte pak rritje, Krasniqi ka bërë thirrje që kjo ngjarje të shërbej për rritje të bashkëpunimit, e cila do të ndikonte në rritjen e eksportit dhe investimeve në vendin tonë.
Krasniqi ka shprehur gatishmërinë e DhTIK-së për rritje të bashkëpunimit edhe në fusha tjera të ekonomisë, duke qenë se dyja shoqata kanë biznese të shumë sektorëve.
Sipas një postimi të publikuar në Facebook nga Dhoma e Tregtisë, në këtë ngjarje shumë biznese anëtare të Dhomës, kanë marrë pjesë në takimet B2B me bizneset turke.
Përndryshe, Kosova mbetet po ashtu një vend jo tërheqës për investime të huaja, sidomos nga kompanitë dhe markat e mëdha botërore. Sipas BQK-së, Investimet e Huaja Direkte nga janari deri në shtator 2024 arritën vlerën e 657.3 milionë eurove, që sipas ekspertëve të ekonomisë kjo tregon se ritmi i rritjes së investimeve ka pësuar një ngadalësim. Në aspektin sektorial, aktivitetet e patundshmërisë dominuan investimet e huaja direkte.
