Indeksi i dollarit, i cili mat vlerën e dollarit amerikan kundrejt gjashtë monedhave kryesore, u rrit 0.4 për qind javën e kaluar në 99.59 pikë, duke u larguar nga nivelet më të ulëta në tre vjet. Kursi i euros ra me 0.2 për qind, në 1.1365 dollarë.
Monedha amerikane është forcuar edhe ndaj asaj japoneze, me 1 për qind, duke arritur në 143.65 jen. Pas disa javësh rënie, dollari u forcua kundrejt një shporte valutash javën e kaluar, por vlera e tij u luhat ndjeshëm, raporton KosovaPress.
Në fillim të javës, indeksi i dollarit ra nën 98 pikë për herë të parë që nga marsi i vitit 2022, teksa presidenti amerikan Donald Trump sulmoi ashpër kryetarin e Rezervës Federale të SHBA, Jerome Powell, pasi ky i fundit ka thënë se nuk do të ndërmarrë asnjë veprim për normat e interesit ndërsa pret të dhëna se si rritja e tarifave do të ndikojë në inflacion dhe në rritjen ekonomike.
Sulmi i Trump vuri në pikëpyetje pavarësinë dhe besueshmërinë e bankës qendrore, gjë që tronditi tregjet financiare të hënën. Megjithatë, tregjet u qetësuan të martën pasi Trump tha se nuk kishte plane të largonte Powell-in, por donte vetëm norma më të ulëta interesi.
Deri në fund të javës, dollari ishte forcuar disi kundrejt një shporte valutash falë shpresave të investitorëve për një lehtësim të tensioneve tregtare midis SHBA-së dhe Kinës.
Ende nuk ka asgjë konkrete për këtë çështje, por investitorët besojnë se herët a vonë do të arrihet një marrëveshje, duke pasur parasysh zbutjen e retorikës së Shtëpisë së Bardhë për këtë çështje.
“Nuk më duket se situata është shumë më e qartë tani se më parë, por të gjitha këto mesazhe duket se paralajmërojnë një ulje, jo një rritje të tensioneve,” tha Fiona Cincotta, një strateg në Citi.
Pavarësisht fitimeve të javës së kaluar, dollari është ende në rënie rreth 4 për qind që nga ‘Dita e Çlirimit’ më 2 prill, kur Trump njoftoi tarifa masive reciproke.
Megjithatë, tërheqja e investitorëve nga dollari duket se po lehtësohet.
“Dollari është forcuar disi, por është padyshim shumë herët për të hapur shampanjën për të festuar rimëkëmbjen e saj. Ne nuk jemi ende atje,” tha Cincotta./kp
