“Vendi ynë i sheh migrantët jo vetëm si fuqi punëtore, por si bartës të njohurive, përvojës, shkëmbimit kulturor dhe potencialit ekonomik. Përfshirja e rregulluar e punëtorëve të huaj kontribuon në rritjen e produktivitetit, zhvillimin e industrive që kërkojnë punë intensive dhe stabilizimin e punësimit”, theksoi ministri i Ekonomisë dhe Punës, Besar Durmishi, në konferencën rajonale për migrimin e fuqisë punëtore që po mbahet në Budvë, në organizim të Organizatës Ndërkombëtare për Migrim (IOM) dhe institucionet partnere nga rajoni.
Nga Ministria e Ekonomisë dhe Punës sot njoftuan se Durmishi ka mbajtur një panel diskutimin në të cilën me homologët nga rajoni është diskutuar për perspektivën rajonale për migrimim e fuqisë punëtore në Ballkanin Perëndimor.
“Që migrimi i fuqisë punëtore të jetë i suksesshëm, ai duhet të shoqërohet me politika sociale dhe integruese. Kjo do të thotë mbrojtjen e të drejtave të punëtoreve, luftën kundër diskriminimit, respektimin e dallimeve kulturore dhe sigurimin e qasjes së barabartë në informacion dhe institucione”, tha ministri Durmishi.
Ai shtoi se në Maqedoninë e Veriut në përputhje me Ligjin për Punësimin dhe Punën e të Huajve, sigurohet mekanizëm ligjor i qëndrueshëm dhe i qartë, përmes të cilit punëtorët e huaj mund të përfshihen në ekonominë e vendit tonë, gjithmonë në përputhje me nevojat dhe standardet e brendshme.
Ligji parashikon vendosjen e një kuote vjetore për lejet e punës, e cila nuk duhet të kalojë 5 për qind të popullsisë së përgjithshme të punësuar në vend”, tha Durmishi.
