1 Marsi besimtarët myslimanë i gjen në muajin e shenjtë të Ramazanit, ditë agjërimi që shoqërohet me përkushtim më të madh fetar. Madhështia qëndron në sofrën e iftarit, kur mbrëmja i bashkon anëtarët familjarë për ta mbyllur ditën e agjërimit. Rëndom iftari shoqërohet me gatesa të ndryshme, por këtë vit ankesat e qytetarëve flasin për mospërballje të çmimeve dhe pamundësinë për darka të shumëllojshme. Sidomos pemët dhe perimet mbeten ndoshta vetëm për t’i shikuar në treg. Dyshojnë edhe në manipulimet e çmimeve me rastin e Ramazanit, ndërkaq faj për ta ka edhe Qeveria, sepse nuk ushtron kontroll sa duhet.
“Shtrenjtësi e madhe, po do ta përballojmë. Mund të rregullohet kur të na rriten pensionet.”, – tha një qytetar.
“Për mua të përshtatshme, por jo për të gjithë. Shtrenjtë. Njerëzit i kanë mundësitë më të vogla, nuk e di për të tjerët. Shumica nuk kanë buxhet të mjaftueshëm.”, – tha një qytetar tjetër.
“Besoj pak i kanë rritur këtë muaj se ku ta di, ndoshta e shohin profitin dhe çmimet i çojnë më lartë.”, – u shpreh një qytetar.
“Çmimet janë të larta. Ata i kanë rritur para se të vijë Ramazani. Në kontroll duhet t’i mbajë Qeveria, të japë ligje më të mira. Duhet të ketë ligje, që kontrolli të jetë më i ashpër, më i drejtë për të gjitha marketet, edhe për të voglat.”, – u shpreh një qytetar tjetër.
Shitësit: Importi detyron rritjen e çmimeve
Ndërkohë shitësit mirëkuptojnë blerësit dhe janë të vetëdijshëm për rritjen e çmimeve, por sipas tyre, çmimin e dikton qarku ekonomik, doganat e larta dhe importi, të cilat përfundimisht faturohen në çmimin e produkteve.
“Malli vjen prej eksportit, çmimet prej andej reagojnë në tregun me shumicë. Shtrenjtë është edhe atje ku e marrim ne, çmimet varen nga eksporti, nuk është që e prodhojmë ne këtë mall. Mund të jetë pak i shtrenjtë, e blejmë shtrenjtë dhe e japim shtrenjtë.”, – tha një shitës.
“Qëndrojmë pas vlerësimit të qytetarëve për arsye se këto domate vijnë prej jashtë, prej Turqisë, çmimet janë të larta, kurse pagat e ulëta. Mund të rregullohet, pak me doganat, pak të rriten pagat, por jo me paga 400-500 euro.”, – tha një shitës tjetër.
Çdo vit për muajin e Ramazanit, miliona myslimanë në të gjithë botën agjërojnë për 30 ditë nga mëngjesi në mbrëmje. Muaji pos tjerash zgjon dashurinë për bamirësi, kujdes ndaj të varfërve dhe përpjekje për pastrim shpirtëror.
