-Lidhja është një pozicionim strategjik dhe synim i Qeverisë. Korridoret 8 dhe 10 janë strategjike për Maqedoninë si shtet nga shumë aspekte dhe për këtë arsye ky është prioriteti ynë më i madh, porositi sot kryeministri Hristijan Mickoski gjatë inspektimit të aktiviteteve për ndërtimin e autostradës Gostivar-Bukojçani.
“Ndërtimi i autostradës, modernizimi i hekurudhës, hekurudha e shpejtë në Korridorin 10, lidhja energjetike përmes linjave të tensionit të lartë, si dhe gazi – po ndërtohet intensivisht gazsjellësi me Greqinë. Këtë javë po fillojmë me shpalljen e tenderit për gazsjellësin me Serbinë, tashmë janë marrë të gjitha mendimet për këtë tubacion, ndërsa në funksion është edhe naftësjellësi nga porti i Selanikut deri në Shkup. Kur kjo të përfundojë, atëherë mund të themi se jemi një qendër rajonale”, tha Mickoski.
Ai njoftoi se Qeveria do të vazhdojë t’i mbështesë këto projekte dhe pret që shumë shpejt të mund të hapet pjesa e mbetur e autostradës Kërçovë-Ohër, si dhe gazsjellësi me Greqinë në gjysmën e parë të vitit të ardhshëm.
Në autostradën Gostivar-Bukojçani, e cila është pjesë e paketës së rrugëve që po ndërtohen nga “Bechtel dhe Enka”, po punohet në 11 kilometra nga gjithsej 31.
