Një grup tregtar që përfaqëson pothuajse të gjithë prodhuesit kryesorë të automjeteve ka paralajmëruar se tarifat e reja prej 25 për qind mbi importet nga Kanadaja dhe Meksika, të vendosura nga Presidenti i Shteteve të Bashkuara, Donald Trump, do të çojnë në rritje drastike të çmimeve.
“Të gjithë prodhuesit e automjeteve do të ndikohen nga këto tarifa në Kanada dhe Meksikë”, ka thënë John Bozzella, i cili kryeson Aleancën për Inovacionin e Automobilave që përfaqëson të gjithë prodhuesit kryesorë të automjeteve në SHBA, përveç Teslas. Anëtarët përfshijnë General Motors Ford, Toyotan, Volkswagenin, Hyundain dhe Stellantisin.
Ai ka shtuar se shumica parashikojnë se çmimi i disa modeleve të automjeteve do të rritet deri në 25 për qind dhe ndikimi negativ në çmimin e automjeteve dhe disponueshmërinë e automjeteve do të ndihet pothuajse menjëherë.
Prodhuesit e automjeteve kanë alarmuar se tarifat do të prishin zinxhirin e integruar të furnizimit në të gjithë Amerikën e Veriut që ka qenë në fuqi për më shumë se 25 vjet.
Shoqata Amerikane e Tregtarëve Ndërkombëtarë të Automobilave vuri në dukje se tregtarët tashmë përballen me rritje të çmimeve të automjeteve dhe pjesëve, si dhe norma të larta interesi.
“Tarifat mund të kontribuojnë drejtpërdrejt në mijëra dollarë shtesë në çmimet e afisheve”, ka theksuar grupi.
