Guvernatori i Bankës Qendrore të Republikës së Kosovës (BQK), Ahmet Ismaili së bashku me Zëvendësguvernatorët Dardan Fusha dhe Milot Cakaj dhe bashkëpunëtorë ka takuar ekspertët e Misionit të Bankës Botërore (BB) në kuadër të Projektit për Zhvillimin e Sektorit Financiar (FinDev) me prezencën e Massimiliano Paolucci – Menaxher i Vendit për Kosovën dhe Maqedoninë e Veriut, në Rajonin e Evropës dhe Azisë Qendrore të Bankës Botërore.
Temat kryesore për diskutim ishin përgatitjet e nevojshme për zbatimin e Projektit më të ri për Zhvillimin e Sektorit financiar, përkatësisht komponentëve të digjitalizimit të shërbimeve financiare (sistemi i pagesave të shpejta) si dhe rritja e stabilitetit të sektorit financiar përmes avancimit të kornizës rregullative dhe kapitalizimit të Fondit të Sigurimit të Depozitave.
Përfaqësuesit e BQK-së në këtë takim njoftuan ekspertët e BB-së mbi aktivitetet e fundit të BQK-së në funksion të realizimit të objektivave dhe të Planit Strategjik, procesin e para-aplikimit në Zonën Unike të Pagesave në Euro (SEPA) dhe procesin e zhvillimit të sistemit të pagesave të shpejta të Eurosistemit, i njohur si TIPS.
Gjithashtu, ata u njoftuan edhe për aktivitetet e ndërmarra nga BQK për avancimin e infrastrukturës teknike të BQK-së.
Ismaili duke shprehur falënderimin për mbështetjen e Bankës Botërore, ka informuar edhe për zhvillimet në sektorin financiar, veçanërisht miratimi i Udhërrëfyesit Strategjik për Menaxhimin dhe Mbikëqyrjen e rreziqeve të lidhura me klimën dhe mjedisin në sektorin financiar, e cila ishte me mbështetjen e Qendrën Këshilluese për Sektorin Financiar (FinSAC) të vet Bankës Botërore.
Ndërkaq, Paolucci rikonfirmoi mbështetjen e Bankës Botërore për projektet në proces dhe shprehën gatishmërinë për zhvillimin e tyre sipas planifikimeve të parapara.
Kjo vizitë nënvizon bashkëpunimin e shkëlqyeshëm midis dy institucioneve si dhe mbështetjen e vazhdueshme të BB-së për të avancuar stabilitetin financiar si dhe modernizimin e shërbimeve të sektorit financiar të vendit.
