Ministri i ekonomisë, Besar Durmishi bëri të ditur se kompania Cavo Otomotiv do të investojë në Tetovë në vlerë prej 20 milionë eurove, që siç tha ministri, do të hapen 550 vende të reja pune. Durmishi tha se Cavo Otomotiv është kompani e njohur ndërkombëtare dhe me përvojë disa dekada në industrinë e automobilave që siç tha, investimi i tyre në Maqedoni tregon se vendi po fiton besimin e investitorëve globalë.
“Pas më shumë se një dekade, investim i ri në Tetovë! 21 milionë euro investim i jashtëm, 550 vende të reja pune për Tetovën dhe Pollogun!
Sot shënuam një tjetër hap të rëndësishëm për zhvillimin ekonomik të vendit. Investimi i ri i kompanisë ndërkombëtare Cavo Otomotiv në ZZHTI Tetovë është dëshmi e qartë se Maqedonia e Veriut po fiton besimin e investitorëve globalë. Ky investim nënkupton mundësi reale për punësim, zhvillim profesional dhe një të ardhme më të mirë për qindra familje. Si Ministër i Ekonomisë dhe Punës, mbetem i përkushtuar që të krijojmë kushte për investime të reja, ekonomi më të fortë dhe vende pune të mirëpaguara për qytetarët tanë”, tha Durmishi
