Rritja e çmimit të karburanteve po i shtyn gjithnjë e më shumë shqiptarët t’u drejtohen vendeve fqinje, ku çmimet janë më të ulëta. Diferenca e çmimit shkon në 74 lekë për litër, duke bërë që shumë qytetarë nga Korça e Pogradeci të shkojnë në Strugë për t’u furnizuar me naftë.
Qytetarët thonë se çmimet e larta në Shqipëri i detyrojnë të zgjedhin furnizimin në Maqedoninë e Veriut si alternativën më të përballueshme.
Nga ana tjetër, banorë të Maqedonisë së Veriut shprehen se edhe pse çmimet kanë pësuar rritje edhe atje, mbeten më të ulëta krahasuar me Shqipërinë.
Aktualisht, një litër naftë në Maqedoninë e Veriut kushton rreth 93 denarë ose 140 lekë/litër, ndërsa në Shqipëri çmimi është 214 lekë për litër. Ky ndryshim i madh në çmime vazhdon të nxisë qytetarët të kalojnë kufirin për të përfituar nga kostot më të ulëta.
