Katër shtëpi në SOS Fshatin e Fëmijëve në Shkup nga tani do të përdorin energji diellore, falë donacionit të kompanisë OKTA. Janë instaluar panele solare me kapacitet total prej 24 kWp, me prodhim vjetor prej 32,4 MWh, si dhe katër sisteme baterish për ruajtjen e energjisë me kapacitet prej 20 kWh.
Ky investim përfaqëson fazën e parë të një projekti trevjeçar. Sipas planit, deri në vitin 2027 të gjitha shtëpitë ku jetojnë familjet kujdestare në SOS Fshatin e Fëmijëve do të pajisen me centrale solare dhe sisteme për ruajtjen e energjisë. Projekti do të mundësojë ulje të ndjeshme të shpenzimeve për energji elektrike, rritje të qëndrueshmërisë dhe përmirësim të kushteve të banimit.
“Qëndrueshmëria është një përgjegjësi e përbashkët. Ky projekt është një nder për ne, sepse kontribuon drejtpërdrejt në përmirësimin e cilësisë së jetës së fëmijëve në SOS Fshatin e Fëmijëve dhe na motivon ta vazhdojmë bashkëpunimin në të ardhmen”, deklaroi Dimitrios Pashos, drejtor ekzekutiv i OKTA-s.
Sipas vlerësimeve, instalimi i paneleve solare në këto katër shtëpi do të reduktojë gjurmën e karbonit me rreth 26 tonë në vit. OKTA edhe më herët ka mbështetur SOS Fshatin e Fëmijëve përmes donacioneve të ndryshme.
Drejtoresha kombëtare e SOS Fshatit të Fëmijëve, Julijana Nakova Gapo, theksoi se projekte të tilla kanë ndikim afatgjatë, pasi rrisin efikasitetin energjetik dhe lejojnë që mjetet financiare të ridrejtohen drejt mbështetjes direkte për fëmijët dhe familjet kujdestare, duke krijuar një mjedis më të shëndetshëm dhe më të qëndrueshëm.
OKTA planifikon ta përmbyllë vitin 2025 me gjithsej gjashtë donacione të centraleve fotovoltaike për institucione edukative dhe arsimore, ndërsa edhe vitin e ardhshëm parashikon zgjerimin e këtyre aktiviteteve në nivel lokal dhe kombëtar.
