Zgjedhjet e kanë bllokuar pagesën e ndihmës shtetërore për kompanitë e huaja. Sipas përfaqësuesve të bizneseve të huaja që veprojnë në vend, për herë të parë po ndodh të ketë vonesa në këto pagesa, gjë që, siç thonë ata, nuk është shenjë e mirë, raportoi Telma, transmeton Portalb.mk.
Drejtori ekzekutiv i ODV Electric, Ognen Cubalevski, thotë se edhe më herët ka pasur zgjedhje, por pagesat nuk janë vonuar.
“Këtë vit, për herë të parë kemi devijim për shkak të zgjedhjeve. Ende nuk është kryer pagesa e ndihmës shtetërore. Prej 12 vitesh pagesat kanë ardhur në kohë, pavarësisht sa zgjedhje ka pasur, dhe asnjëherë nuk ka pasur vonesa. Këtë vit, për herë të parë nuk paguhet, me arsyetimin se është për shkak të zgjedhjeve lokale. Dhe kjo, mendoj unë, nuk është mirë dhe nuk i duhet Maqedonisë,” deklaroi Cubalevski.
Ndërkohë, kriza në industrinë automobilistike në Gjermani po ndihet edhe në Maqedoni. Meqenëse tregu gjerman po stagnon, po hapet hapësirë për hyrjen e automjeteve kineze, të cilat, megjithatë, nuk janë partnere të investitorëve në Maqedoni.
Sipas Viktor Mizo, kryetar i Këshillit të Investimeve të Huaja, një rol të madh po luajnë tarifat amerikane.
“Tarifat që u vendosën nga administrata Trump, kryesisht për prodhuesit premium të automjeteve në Europë, të cilët tregun më të madh e kanë në SHBA, ajo tarifë shtesë prej 15% po ndikon ndjeshëm në shitjet e Mercedesit, BMW-së dhe Range Roverit. Ne prodhojmë komponentë pikërisisht për këto kompani. Nëse shikoni shifrat e fundit për profitabilitetin e tyre, do të shihni se fitimi i Porsche për nëntëmujorin është ulur mbi 95% krahasuar me një vit më parë. Situata është e ngjashme edhe te Mercedes dhe Volkswagen,” u shpreh Mizo.
Për shkak të këtyre problemeve, kompanitë Aptiv dhe Dura janë pranë mbylljes së kapaciteteve të tyre në zonën industriale të Shkupit. Kompani të tjera kanë ulur numrin e të punësuarve, ndërsa disa kanë hequr turnet e punës.
Sipas të dhënave më të fundit të Bankës Popullore, vitin e kaluar në dy tremujorët e parë, investimet e huaja direkte arritën rreth 560 milionë euro. Këtë vit, në të njëjtën periudhë, ato janë përgjysmuar, duke rënë në pak mbi 220 milionë euro.
