Ekonomia kineze ruajti qëndrueshmërinë e përgjithshme në gusht dhe pati përparim të qëndrueshëm, sipas të dhënave të publikuara të hënën nga Zyra Kombëtare e Statistikave (NBS).
Të dhënat e NBS-së tregojnë që muajin e kaluar prodhimi industrial u rrit 5.2 për qind në krahasim me të njëjtën periudhë të vitit 2024. Prodhimi i pajisjeve u shtua me 8.1 për qind dhe prodhimi i teknologjisë së lartë me 9.3 për qind.
Tregu i konsumit ka arritur gjithashtu rritje të qëndrueshme. Shitjet me pakicë e kaluan shifrën 3.96 trilionë juanë (557 miliardë dollarë), duke njohur një rritje prej 3.4 për qind. Shitjet me pakicë në internet vijuan të spikatin, duke u ngritur 9.6 për qind në tetë muajt e parë në krahasim me të njëjtën periudhë të vjetshme dhe duke arritur në 9.98 trilionë juanë.
Të dhënat e NBS-së tregojnë gjithashtu që investimet në pasuri fikse nxitën rritjen në tetë muajt e parë, me vlerën e përgjithshme të investimeve që u rrit 0.5 për qind në krahasim me të njëjtën periudhë të vitit të kaluar, duke arritur në mbi 32.61 trilionë juanë.
Vëllimi i tregtisë së jashtme vazhdoi të shtohet në gusht, duke arritur në 3.87 trilionë juanë, 3.5 për qind më shumë se në të njëjtin muaj të vitit të kaluar.
Ndërkohë, çmimet e banesave në 70 qytete të mëdha e të mesme të Kinës vazhduan të bien në gusht. Çmimet e banesave të reja në qytetet e nivelit të parë u ulën me 0.9 për qind, nga rënia prej 1.1 për qind e regjistruar në korrik, ndërsa çmimet e banesave jo të reja ranë me 3.5 për qind.
