Tregjet evropiane kanë shënuar një nga ditët më të forta të këtij viti, duke arritur kulmin e gjashtëmujorit mes optimizmit për një marrëveshje paqeje mes Rusisë dhe Ukrainës.
Sipas Reuters, indeksi pan-evropian STOXX 600 u rrit me 0.7% të martën, ndërsa bursat në Londër, Frankfurt, Paris dhe Milano shënuan fitime të ndjeshme nga 0.3% deri në 1%, duke dhënë sinjale të fuqishme stabilizimi.
Por jo të gjitha sektorët përfituan. Financial Times raporton se industria e mbrojtjes pësoi një goditje të rëndë, me rënie prej rreth 2.6% të indeksit, duke lënë kompani të mëdha si Leonardo, Hensoldt dhe Rheinmetall me humbje të mëdha.
Ndërkohë, sipas The Guardian, tregjet vazhdojnë të mbeten të ndjeshme ndaj zhvillimeve diplomatike dhe vendimeve të pritshme të Fed-it në Jackson Hole. Megjithatë, investitorët tashmë po hedhin sytë tek sektorët industrialë, të ndërtimit dhe financave, të cilët shihen si përfituesit kryesorë të një stabilizimi të mundshëm.
Çfarë do të thotë kjo për rajonin tonë?
Ekspertët theksojnë se një stabilizim i tregjeve evropiane do të ndikonte drejtpërdrejt edhe ekonomitë e vogla të Ballkanit, përfshirë Shqipërinë dhe Kosovën, të cilat varen fuqishëm nga remitancat, investimet e huaja dhe turizmi. Një klimë më e qëndrueshme ekonomike në BE pritet të përkthehet në më shumë investime, rritje të konsumit dhe lehtësim të presionit inflacionar në rajon.(INA)
