Zëvendësministri i Bujqësisë nga radhët e koalicionit VLEN, Albrim Hoxha, duke përshëndetur kandidaturën e biznesmenit Mendi Qyra për komunën e Strugës, theksoi se në kushte normale kjo komunë nuk do të duhej të kishte nevojë për garë politike për kryetar.
Hoxha shprehet se figura si Mendi Qyra përfaqësojnë unitetin qytetar dhe vlera që shkojnë përtej përkatësive partiake.
“E vetmja garë duhet të jetë ajo për përbërjen e Këshillit Komunal”, thekson ai.
Duke e cilësuar Strugën si viktimë të keqqeverisjes dhe interesave të ngushta për shumë vite, Hoxha paralajmëron se rikthimi i mendësive dhe figurave që kanë përfituar nga qyteti do të ishte një kthim mbrapa që nuk duhet lejuar.
Ai vlerëson kontributin e Mendi Qyrës, duke thënë se ai ka dhënë shumë për Strugën pa mbajtur ndonjë funksion zyrtar.
“Ai nuk vjen për të marrë, por për të dhënë – ashtu siç ka dhënë ndër vite për Strugën tonë,” përmbyll reagimin e tij Zëvendësministri Hoxha.
