Në Londër sot do të ndodh nënshkrimi i marrëveshjes strategjike midis Maqedonisë së Veriut dhe Mbrëtërisë së Bashkuar, marrëveshje kjo me vlerë prej 6 miliardë eurosh. Zëvendëskryeministri i parë i Maqedonisë së Veriut, Izet Mexhiti, pas takimit në Londër me përfaqësues të Instrumentit për Mbështetje të Financimit të Jashtëm të Mbretërisë së Bashkuar – UKEF tha se marrëveshja për partneritet strategjik me Mbretërinë e Bashkuar zgjidh probleme jetike për qytetarët e Maqedonisë së Veriut. Ai gjithashtu shtoi se me te përfshihen projekte infrastrukturore dhe të shëndetësisë, arsimit dhe transportit, ndërsa kjo marrëveshje do të jetë në dobi edhe për mjedisin jetësor
“Sa i përket fushave të arsimit dhe shëndetësisë, parashihet ndërtimi i një spitali të ri në qytetin e Kërçovës, rikonstruksioni i spitalit të Tetovës, si dhe ndërtimi i Fakultetit të Mjekësisë në të njëjtën qytet. Po ashtu, në Shtip është planifikuar rikonstruksioni i spitalit dhe ndërtimi i Fakultetit të Mjekësisë,” deklaroi Mexhiti për TVM.
Ai shtoi se gjatë takimeve u diskutua edhe një ide e re nga Ministria e Mjedisit dhe Ambientit Jetësor për të shfrytëzuar këtë mundësi financiare, si dhe ekspertizën dhe përvojën britanike për të eliminuar mbetjet e rrezikshme që prej dekadash paraqesin kërcënim për ambientin dhe shëndetin publik në vend.
“Fokus i veçantë iu kushtua pastrimit të mbetjeve të rrezikshme si lindani në fabrikën e Ohisit, në Jugohrom, në Vaksincë e Llojan, të cilat përbëjnë rrezik potencial për gjithë vendin,” theksoi Mexhiti.
