Nuk kanë fund bëmat e Fatmir Bektashit të “Kontakt”. Ortaku i Familjes Berisha, pasi betonizoi gjysmën e Tiranës, ktheu sytë nga Driloni në Pogradec, ku ka blerë një pjesë toke për të ndërtuar pallate.
Prej muajsh kompania ka nisur rezervimin e apartamenteve, por duket se gjitha po bëhet në mënyrë antiligjore, pasi kompania “Kontakt” nuk ka marrë akoma një aprovim për leje ndërtimi në atë zonë. Për më tepër që ndërtimi bie ndesh me porositë që ka dhënë UNESCO.
Rrjeti investigativ “Citizens” ka shkruar një artikull mbi betonizimin e Drilonit ku ka kërkuar të dhëna nga institucionet.
Bashkia Pogradec u përgjigj zyrtarisht se nuk disponon asnjë të dhënë apo dokumentacion të lidhur me këtë projekt, po ashtu edhe Agjencia Kombëtare e Zonave të Mbrojtura (AKZM) i konfirmoi Citizens.al se nuk e njeh projektin në fjalë.
“Parku i Drilonit, ndodhet në zonën Peizazh i Mbrojtur Ujor/Tokësor, shpallur me VKM-në Nr. 597, datë 25.09.2024 të Liqenit të Pogradecit”. Gjithashtu kjo zonë është edhe Zonë e Trashëgimisë Kulturore Botërore UNESCO”, thekson përgjigja e AKZM.
Ndërsa Agjencisë së Zhvillimit të Territorit (AZHT) u shpreh se për projektin “Pyjet e Drilonit, kompleks me godina banimi 1-9 dhe 12 kate mbi tokë dhe 1 kat nëntokë’, me zhvillues shoqërinë “KONTAKT” SHPK është depozituar një aplikim për leje ndërtimi më datë 08.02.2025.
“Aktualisht, nuk ka ende një vendimmarrje nga Këshilli Kombëtar i Territorit dhe Ujit (KKTU) për këtë aplikim”, i tha AZHT Citizens.al.
Citizens.al kontaktoi kompaninë “Kontakt”, e cila refuzoi të japë informacion mbi projektin. Një përfaqësues i “Kontakt” i tha Citizens se “nuk ka të drejtë ta bëjë këtë artikull” dhe se projekti është miratuar nga UNESCO.
Në të vërtetë, UNESCO nuk ka mandat të miratojë ose refuzojë projekte infrastrukturore në zonat e shpallura Trashëgimi Botërore, kjo është detyrë e institucioneve shqiptare, të cilat u shprehën zyrtarisht se nuk kanë miratuar një leje për këtë projekt. Megjithatë rezervimet për shitje kanë nisur./ Pamfleti
