Qytetet e ndryshme në këtë renditje kanë fituar pikët e tyre në një shkallë 0-10 të gjykuar nga numri i hapësirave të disponueshme për zyra, çmimet e qirave, afërsia e universiteteve më të mira, shpejtësia e internetit (në Mbps) ndër të tjera, shkruan Euronews, përcjell Telegrafi.
Megjithatë, raporti nuk mori parasysh sfondin rregullator, burokracinë apo taksat.
A janë Franca dhe Spanja vendet më të mira për bizneset start-up?
Franca doli shumë mirë në këtë renditje, me dy qytete në top pesëshen, ndërsa Spanja dominon tre vendet e para me dy qytete. Londra renditet në vendin e katërt.
Sipas raportit, Parisi, shtëpia e disa prej universiteteve më të mira të Evropës dhe mjediseve të zyrave, ka “mbështetje nga qeveritë dhe një ekosistem të zhvilluar mirë”.
Lioni, qyteti i tretë më i madh në vend dhe gjithashtu një qendër e madhe universitetesh, renditet në vendin e pestë më të mirë për të filluar një biznes, i mbështetur nga një internet me shpejtësi të madhe – ndër më të shpejtit në Evropë.
Madridi, kryeqyteti i Spanjës, fitoi një renditje të lartë për shkak të internetit të shpejtë dhe numrit të zyrave të disponueshme.
Qyteti tjetër spanjoll në mesin e tre më të mirëve, Barcelona, ka ndërtuar reputacionin e tij gjatë dhjetë viteve të fundit si qendra më e madhe e teknologjisë në Evropën Jugore.
Londra, duke qenë një qendër financiare me avantazhe të tjera, ka përqendrimin më të madh të inkubatorëve të biznesit, ndërkohë që mburret me numrin më të madh të universiteteve në Top 250 në Evropë dhe hapësira të bollshme zyrash (nëse mund t’i përballoni ato).
Ndërkohë kryeqyteti i Mbretërisë së Bashkuar ka më shumë zyra si dhe qiratë më të larta, ndërsa interneti është më i shpejtë në Lion, transporti publik është më i qasshëm në Paris dhe rezultati mesatar më i lartë universitar është i disponueshëm në Mançester, MB, sipas raportit.
Zgjedhja e vendndodhjes së duhur është thelbësore, dhe “ju duhet të konsideroni rrethinën tuaj si një faktor kyç në suksesin e tij”, ka vlerësuar Talveer Sandhu nga The Knowledge Academy.
“Të kesh një seli ose hapësirë pune të përbashkët për ekipin tënd mund të jetë thelbësore në ndërtimin e miqësisë, punës ekipore dhe suksesit. Shpejtësia dhe besueshmëria e rrjetit të internetit është një tjetër faktor vendimtar në drejtimin e një biznesi, me monitorimin e uebsajtit dhe mediave sociale thelbësore në fazat fillestare të ndërtimit të një biznesi dhe promovimit të tij”. /Telegrafi/
