Shkup, 25 shkurt – Kuvendi në seancën e sotme të 35-të miratoi ndryshimet dhe plotësimet në Ligjin për mbrojtjen e konsumatorëve ku deputetët e shumicës presin transparencë më të madhe të çmimeve nëpër markete, përmirësim të konkurrencës dhe ulje të çmimeve.
Deputeti Bojan Stojanovski nga VMRO-DPMNE theksoi se ky ligj miratohet me qëllim të mbrojtjes së standardit jetësor të qytetarëve.
“Jam i befasuar që në Komisionin për çështje ekonomike nuk janë paraqitur amendamente, edhe pse disa nga opozitë e kritikuan këtë ligj për mosdhënien e rezultateve të pritura nga qytetarët. Kritikohen zgjidhjet ligjore të qeverisë, por kur vjen koha për amendamente, nuk dorëzojnë”, ka thënë Stojanovski nga foltorja e Kuvendit.
Ai theksoi se me dorëzimin e këtyre ndryshimeve ligjore, vendosën të shkojnë në dy kahe – të pranojnë praktikat që janë më të mira në vendet perëndimore dhe të ndërmarrin masa që deri tani janë dëshmuar si të mira në praktikë.
“Qytetarët tashmë do të mund të zgjedhin se ku do t’i shpenzojnë paratë e tyre, sepse nuk është normale të ketë çmime nëpër markete që janë më të lartat në nivel ballkanik, çmime më të larta se ato të anëtareve të BE-së, nuk është normale. Jemi të sigurt se në periudhën e ardhshme do të ketë ulje të çmimeve që do të jenë të pranueshme për qytetarët e Maqedonisë”, nënvizoi Stojanovski.
Deputetja e VMRO-DPMNE-së Dragana Bojkovska theksoi se këto ndryshime ligjore do të kontribuojnë edhe në konkurrencën e vetë tregtarëve.
“Me këtë ligj, duke i publikuar çmimet e të gjitha produkteve individuale në ueb faqe dhe në rafte nga shitësit, konsumatorët do të bëjnë krahasimin e çmimeve dhe kështu do të informohen më së miri se cili produkt sa kushton. Ky ligj vlen për shitësit e vegjël, të mesëm dhe të mëdhenj me çka përjashtohen mikrotregtarët dhe tregtarët individual”, ka thënë Bojkovska.
