Shkup, 16 korrik – Gruri këtë vit është me cilësi të mirë dhe rendimentet janë të kënaqshme, thotë Federata Kombëtare e Fermerëve (FKF). Njëherit apelon te institucionet kompetente, veçanërisht te Inspektorati i Bujqësisë, në mënyrë aktive të përfshihen në mbikëqyrjen e blerjes dhe të sigurojnë procedurë korrekte dhe transparente për të gjithë bujqit.
Sipas FKF-së, përveç 12 denarëve të arritura për blerje këtë vit, është e nevojshme të vazhdojnë aktivitetet për rritjen e rendimentit, për uljen e shpenzimeve prodhuese, për vendosjen e marrëdhënieve afatgjatë dhe korrekte mes bujqve, mullistëve dhe blerësve përmes prodhimtarisë së dakorduar, për aktivizimin e blerjes intervenuese në situata të krizave, vendosjen e teknologjive të reja dhe bashkimin ekonomik të fermerëve në kooperativa dhe organitata të prodhuesve.
“Përmes sistemit nënsektorial, vazhdimisht e ndjekim gjendjen me grurin, si në pjesën e prodhimtarisë, ashtu edhe në pjesën e shitjes. Kjo kulturë strategjike gjithmonë përballet me sfida gjatë blerjes dhe çmimit të lartë prodhues. Këtë vit, me ndërmjetësimin e MBPEU-së, është arritur marrëveshje me blerësit që çmimi për klasën e parë dhe të dytë të arrijë 12 denarë për një kilogram, me atë që në këtë çmim do të shtohen edhe shpenzimet për transport dhe TVSH, të cilat do t’i mbulojnë mullistët, përkatësisht gruri i cili transportohet nga rajoni pa mullinj do të ketë shpenzime transportuese shtesë të mbuluara. Besojmë se kjo është zgjidhja për këtë vit”, citojnë nga FKF.
Federata kujton se gruri është një produkt strategjik për shtetin, i përcaktuar në përputhje me Ligjin për Bujqësinë dhe Zhvillimin Rural. Ai mbetet kultura më e zakonshme midis drithërave, me 69,689 hektarë të mbjellë ose 44.5 përqind të sipërfaqes totale me drithëra (156,469 hektarë).
