Çmimet e vezëve në SHBA kanë arritur një rekord të ri, ku dymbëdhjetëshe sosh kushtuan mesatarisht 6.23 dollarë në muajin mars, pavarësisht një rënieje të çmimeve me shumicë dhe mungesës së shpërthimeve të gripit të shpendëve në fermat e vezëve.
Që nga fillimi i vitit, vendi ka përjetuar çmime rekord, duke arritur në 5.90 dollarë në muajin shkurt, sipas Byrosë së Statistikave të Punës në SHBA, më shumë se dyfishi i mesatares afatgjatë prej 2 dollarësh.
Një nga arsyet kryesore për këtë rritje çmimesh është shpërthimi i gripit të shpendëve, i njohur ndryshe si gripi i zogjve, me të cilin SHBA po përballet që nga viti 2022, shkruan skynews.
Vetëm këtë vit, më shumë se 30 milionë zogj që prodhojnë vezë janë therur për të parandaluar përhapjen e sëmundjes, pjesërisht për shkak të një politike federale që kërkon nga fermerët të vrasin të gjitha tufat e tyre sa herë që një zog sëmuret. Që nga fillimi i shpërthimit tre vjet më parë, më shumë se 166 milionë zogj janë vrarë.
Ndërsa kërcënimi i gripit të shpendëve u rrit, po ashtu u rrit edhe kërkesa për vezë, duke shkaktuar një rritje të mëtejshme të çmimeve. Në fillim të vitit, çmimi i vezëve arriti një rekord prej 4.95 dollarë për dymbëdhjetëshe.
Departamenti amerikan i Drejtësisë ka nisur një hetim për të përcaktuar nëse ka pasur manipulime të çmimeve nga prodhuesit e mëdhenj të vezëve. Cal-Maine Foods, prodhuesi më i madh i vezëve në vend, po bashkëpunon me këtë hetim. Kompania raportoi fitime që u trefishuan krahasuar me vitin e kaluar, kryesisht për shkak të rritjes së çmimeve të vezëve.
Rritja e çmimeve ka ndikuar ndjeshëm në buxhetet familjare, veçanërisht gjatë festave si Pashkët dhe Pashka Hebraike, ku vezët janë një përbërës kryesor. Disa konsumatorë kanë kërkuar alternativa ose kanë reduktuar blerjet e vezëve për shkak të çmimeve të larta. /Telegrafi/
